Il pan al è un prodot alimentâr che al ven de lievitazion di un impast di farine di blavis, aghe e, no simpri, cuincis. Po dopo al ven cuet intal for. Lis recipis plui cognossudis a proviodin di doprâ dôs parts di forment e une di aghe, sâl e levan. Chel tradizionâl al jere une part di impast vanzât di une pastanâde di prin (levan naturâl fat di paste garbe, ferments dal gjenar Lactobacillus soredut, clamât par solit fece mari).
A 'ndi è altris recipis o variantis a secont de cualitât de farine doprade dongje a chê di forment o in sô sostituzion (par esempli di sorc, saròs, siale, o ancje che e ven di liums tant che la soie), o ancjemò de sorte di cuince (lat, vueli, spongje, saìn).
Al à un puest inte nestre tradizion tant che te alimentazion ancje te culture popolâr, par esempli cu la detule "cuistâsi il pagnut". La peraule po deventâ sinonim dal mangjâ e di nudriment, no nome fisic. Il sâl lu si zonte cuasi dapardut fûr che tal pan azim, tant di chel de Toscane e de Umbrie. Par solit cumò si dopre la fece di bire (Saccharomyces cerevisiae) al puest de fece mari par judâ a jevâ la paste plui di corse e par gramolâle di mancul.

In cualchi paîs dal orient vicin si use pan cence levan, azim, splanât a fuiace. I Ebreus lu mangjin cuant che a fasin memorie de lôr Pasche. Secont lis Sacris Scrituris, la Ultime cene di Jesu Crist e fo propite cul pan azim.

Classiche forme dal pan furlan al è il cuarnet.

Il pan biologjic al ven di farinis coltadis cence velens e masanadis a piere: cussì a son biel che messedadis la part amide cun che grasse e la farine e ven naturalmentri insiorade di vitaminis e sai minerâi.